ကျွန်တော်တို့နေထိုင်တဲ့ကမ္ဘာပေါ်မှာ နှစ်တွေပြောင်းလဲလာတာနဲ့အမျှ နည်းပညာတွေလည်း ဖွံ့ဖြိုးတိုးတက်လာပါတယ်။ နည်းပညာတစ်ခုတည်းသာမကပဲ ပညာရေးနဲ့အလုပ်အကိုင်အခွင့်အလမ်းတွေ၊ လူမှုရေးနဲ့စီးပွားရေးကဏ္ဍနယ်ပယ်အသီးသီးဟာလည်း လူငယ်တွေကို စိန်ခေါ်မှုအသစ်တွေနဲ့ ကြိုဆိုလျက်ရှိပါတယ်။ ဒီအပြောင်းအလဲတွေကို အမှီလိုက်နိုင်ဖို့အတွက် လိုအပ်တဲ့အရည်အသွေးတွေ၊ Skills Set တွေနဲ့အတူ အသင့်ပြင်ဆင်ထားဖို့လည်း လိုအပ်ပါတယ်။ အထူးသဖြင့် ဘွဲ့ရပြီးတာနဲ့ လုပ်ငန်းခွင်ဝင်ဖို့စဉ်းစားနေတဲ့ လူငယ်တွေအနေနဲ့ ကိုယ့်ရဲ့ရည်မှန်းချက်ပန်းတိုင်ကိုအရောက်သွားဖို့ဆိုရင် ပြင်ဆင်မှုတွေအများကြီးလိုအပ်ပါတယ်။ ဒီအကြောင်းအရာနဲ့ပတ်သက်ပြီး ကောင်းမွန်တဲ့အလုပ်အကိုင်လမ်းကြောင်းပေါ်သွားတဲ့နေရာမှာ အထောက်အကူရစေနိုင်ဖို့ အောက်မှာဖော်ပြထားတဲ့အကြံပေးချက်လေးတွေကိုဆက်ပြီးဖတ်ကြည့်ပေးပါဦး...
၁။ Find your passion
ဘာကိုမှစမလုပ်ခင် အရင်ဆုံးအဖြေရှာရမှာတစ်ခုက ကိုယ်ဘယ်အရာကိုတကယ်ဝါသနာပါလဲ၊ ဘာလုပ်ချင်တာလဲ၊ ဘာဖြစ်ချင်တာလဲဆိုတာပါပဲ။ ဥပမာ ကိုယ်ကသွက်သွက်လက်လက်နေတတ်ပြီး စကားပြောကောင်းတဲ့သူ၊ ဖော်ရွေတတ်တဲ့သူဆိုရင် နေ့စဉ်လူအများနဲ့ပြောဆိုဆက်ဆံရခြင်းမျိုးမရှိတဲ့အလုပ်မျိုးကိုရွေးမိတဲ့အခါ ရေရှည်မှာ ဘယ်နည်းနဲ့မှပျော်နိုင်မှာမဟုတ်ပါဘူး။ ဒါကြောင့်အချိန်တစ်ခုပေးပြီး ကိုယ်ရောက်ချင်တဲ့ပန်းတိုင်ကိုချမှတ်ဖို့ရာ အရင်ဆုံးကြိုးစားသင့်ပါတယ်။ ချက်ချင်းကြီးကိုယ်ဘာဖြစ်ချင်တယ်ဆိုတာ မသိနိုင်သေးဘူးဆိုလည်း စိတ်ဓာတ်ကျရာမလိုပါဘူး။ လုပ်ရင်းနဲ့ဝါသနာပါသွားတာမျိုးလည်းဖြစ်နိုင်တဲ့အတွက် ဒီတိုင်းထိုင်မနေဘဲ တစ်ခုခုကို စလုပ်ကြည့်ဖို့တော့အကြံပေးချင်ပါတယ်။
၂။ Know your limit
ကိုယ်ရဲ့လုပ်နိုင်စွမ်းအားကို အမြဲဆန်းစစ်ပါ။ တစ်ခါတစ်လေကျရင် ကိုယ်က ၁၀ လောက်ပဲလုပ်နိုင်မယ်လို့ ထင်ထားပေမယ့် တကယ်တမ်းမဖြစ်မနေလုပ်ရတဲ့အခါ ၉၀၊ ၁၀၀ လောက်ထိလည်း လုပ်နိုင်တာမျိုးလည်း ရှိတတ်ပါတယ်။ ဒါကြောင့် “မဖြစ်နိုင်ပါဘူးလေ” ဆိုပြီး စိတ်လျှော့လိုက်မယ့်အစား အနည်းဆုံး တစ်ခေါက်လောက်တော့ Try ကြည့်သင့်ပါတယ်။ သတိထားရမှာတစ်ခုက အခွင့်အရေးတွေပေါ်လာတဲ့အခါတိုင်း ကိုယ်ဒီတစ်ခေါက် Reject ဖြစ်သွားခဲ့ရင် နောက်ထပ်တစ်ခေါက်ထပ်ကြိုးစားတဲ့အခါ ကိုယ်ဘယ်နေရာမှားနေလဲ၊ လိုအပ်နေလဲဆိုတာတွေရှာပြီး ပထမတစ်ခေါက်ထက်ပိုကောင်းအောင်ပြင်ဆင်ပြီးမှ Try သင့်ပါတယ်။
၃။ Keep learning and developing
ကိုယ်ကဘယ်လောက်ပဲ စိတ်အားထက်သန်နေသည်ဖြစ်ပါစေ၊ ကိုယ်မကျွမ်းကျင်တဲ့နယ်ပယ်တစ်ခုကိုဝင်ဖို့ စဉ်းစားတဲ့အခါ ပထမဆုံးလုပ်ရမယ့်အလုပ်က သင်ယူဖို့ပဲဖြစ်ပါတယ်။ တစ်ရက်ထက်တစ်ရက်၊ တစ်နှစ်ထက် တစ်နှစ် ကိုယ်ဘယ်လောက်ထိ Absorb လုပ်နိုင်သလဲဆိုတာပေါ်မူတည်ပြီး အခွင့်အရေးတွေကလည်းကွာသွားပါတယ်။ ဒီနေ့ခေတ်မှာဆိုရင် ပိုက်ဆံမကုန်ပဲသင်လို့ရတဲ့နည်းတွေ အများကြီးပဲရှိနေပါပြီ။ ဖုန်းထဲမှာအင်တာနက်ရှိရုံနဲ့ YouTube မှာ၊ Facebook မှာ၊ Google မှာစသဖြင့် လူပေါင်းများစွာက အကြောင်းအရာများစွာကို သူတို့ရဲ့ အတွေ့အကြုံတွေအရ Sharing လုပ်ပေးထားတာတွေကို ရှာဖွေကြည့်လို့ရပါတယ်။
၄။ Be consistent
တစ်ခုကို စမ်းလုပ်ကြည့်လိုက်တယ်။ မဖြစ်ဘူး။ လက်လျှော့ပြီးနောက်ထပ်တစ်ခုထပ်လုပ်ကြည့်တယ်။ မဖြစ်လာပြန်ဘူး။ အဲဒီလိုကိစ္စတွေဟာ လူတိုင်းနီးပါးလောက် ကြုံတွေ့နေရတာဖြစ်ပါတယ်။ ကိုယ်တစ်ယောက်တည်း မဟုတ်ပါဘူး။ ဒါပေမယ့် ဘာဖြစ်လို့လူအများစုကနောက်မှာကျန်ခဲ့ပြီး အနည်းစုကသာ အောင်အောင်မြင်မြင်နဲ့ ရှေ့ကိုဆက်သွားနိုင်တာလဲဆိုရင် သူတို့ကလွယ်လွယ်နဲ့လက်မလျှော့လို့ပါ။ အဲဒီတစ်ခုဆိုရင်တစ်ခုကို ဖြစ်အောင် လုပ်ချင်တဲ့စိတ်၊ ဇွဲမလျှော့တဲ့စိတ်၊ မပြောင်းလဲတဲ့စိတ်တစ်ခုက သူတို့ကိုတခြားသူတွေကနေ ကွဲပြားနေစေတာ ဖြစ်ပါတယ်။
အပေါ်မှာဖော်ပြခဲ့တဲ့အချက်တွေကို ကြိုပြီးစဉ်းစားထားမယ်၊ ပြင်ဆင်ထားမယ်ဆိုရင် အလုပ်အကိုင် အခွင့်အလမ်းအတွက်သာမက တခြားသောကိစ္စတွေကို ဆောင်ရွက်တဲ့နေရာမှာလည်း ပိုပြီး လွယ်ကူစွာနဲ့အောင်မြင်နိုင်တာကို သေချာပေါက်ကြုံတွေ့ရမှာဖြစ်ပါတယ်။